2 Tawarikh 31

Iatonna upu’mo te mintu’ apa iate, malemi tu mintu’ to Israel, tu dio ren, lako mintu’ kota Yehuda, natesse-tessei tu mintu’ batu dipodeata, nalellengi tu mintu’ kayu dipodeata sia naseran tu mintu’ inan madao sia inan pemalaran, naputtai lan mai mintu’ Yehuda sia Benyamin sia lan lu Efraim sia Manasye. Mangkato sulemi tu mintu’ to Israel lako kotana, pantan male lako mana’na.

Napamanassami Hizkia tu mintu’ golongan to minaa sia to Lewi, sitinaya pentoeanna to minaa ba’tu to Lewi, la umpemalaran pemala’ ditunu pu’pu’ sia pemala’ kasalamaran, la mengkarang sia umpudi-pudi sia ussa’bu’ pa’pudi-pudian lan babangan to’ tendaNa PUANG.

Iatu pa’durukna datu, tu dipatassu’ dio mai ianan kalena, dipamanassa lako pemala’ ditunu pu’pu’ ke melambi’ sia ke karoen sia lako pemala’ ditunu pu’pu’, ke allo katorroan sia mintu’ bunga’ sombona bulan sia allo kapua, susi disura’na lan Sukaran alukNa PUANG.

Mesuami tu datu lako mintu’ to buda, iamotu pa’tondokan Yerusalem, anna sorong pa’duruk lako to minaa sia to Lewi, kumua anna batta’ tu tau iato mai ungkaritutui Sukaran alukNa PUANG.

Iatonna kaissanammo tu parenta iato, napebudaimi nabaa to Israel tu bua bunga’ gandung sia uai anggoro’ sia minna’ sia tani’ enoan sia mintu’ bura padang sia sebo nabaa tu taa sangpulona mintu’ apa.

Na iatu to Israel sia to Yehuda, tu torro lan mintu’ kota Yehuda umbaa duka taa sangpulona tu mintu’ sapinna sia dombana sia bembe’na; sia ia duka tu taa sangpulona mintu’ apa maindan, tu napamarimbanganan PUANG, Kapenombanna, anna popa’tombon-tombonni.

Iatonna bulan ma’pentallun naparandukmi tau iato mai umpopa’tombon-tombonni, na iatonna bulan ma’pempitu napaupu’mi.

Iatonna saemo tu Hizkia sia mintu’ arung untiroi tu mintu’ apa dipasitombon-tombon, napudimi tu PUANG sia iatu to Israel, taunNa.

Mekutanami tu Hizkia lako mintu’ to minaa sia to Lewi tu diona apa dipasitombon-tombon.

Ma’kadami lako tu Azarya, tominaa kapua, bati’na Zadok, nakua: Randukna tau umbaa pa’duruk lako banuanNa PUANG, kumandemokan sadia’ki sia sebopa tu torrona, belanna Napamasakke-sakke tongan PUANG tu taunNa, naurunganni torropa buda tu sesanna.

Mesuami tu Hizkia umparandan ba’tu pira-pira bilik lan banuanNa PUANG, Naparandanmi tau.

Matutumi tu tau umbaa pa’duruk sia taa sangpulona sia iatu mai apa masero. Iatu pangulunna te mintu’na te, iamotu Konanya, to Lewi, na iatu ma’penduanna, iamotu Simei, siulu’na.

Na iatu Yehiel, Azazya, Nahat, Asael, Yerimot, Yozabad, Eliel, Yismakhya, Mahat na Benaya mandoro’, napangului Konanya sola Simei, siulu’na, susi parentana datu Hizkia sola Azarya, pangulunna banuanNa Puang Matua.

Iatu Kore, to Lewi, anakna Yimna, pa’kampa babangan matallo, umbandoro’i tu mintu’ to langngo’ penaa umpennoloan apa lako Puang Matua la untaa-taai tu pa’duruk lako PUANG sia mintu’ apa tarru’ maindan.

Iatu Eden, Minyamin, Yesua, Semaya, Amarya na Sekhanya matutu untundui tu Kore lan mintu’ kotana to minaa, la untaa-taai lako siulu’na unturu’ golonganna la kapuana la bitti’na.

Sangadi iatu mintu’na muane sitallung taun ba’tu la’bi, dipatama sura’, iamotu mintu’ tau tu sae lako banuanNa PUANG, ke nalambi’omi attunna keallo-keallo la untoe pentoeanna unturu’ golonganna.

Iatu mintu’ to minaa dipatama sura’ unturu’ rapunna, apa iatu mai to Lewi, tu siduangpulomo taunna ba’tu la’bi unturu’ pentoeanna lan golonganna.

Ditaa-taami lako tau iato mai tu dipatamamo sura’ sola mintu’ dapo’na, iamotu bainena, anakna muane sia anakna baine, iamotu lako mintu’ torroanna. Belanna matutu ussorong kalena untoe pentoean maindan.

Na lako bati’na Harun, iamotu mai to minaa, tu torro lan padang kariuan lan lili’ kotana, lan mintu’ kotana den tu tau disa’bu’ sanganna, tu la untaa-taai lako mintu’ muane, bati’ rapu to minaa, sia lako mintu’ to Lewi, tu dipatama sura’.

Susimo penggauranna Hizkia to lan lu mintu’ Yehuda. Napogau’ tu apa melo sia malambu’ sia maruru’ dio oloNa PUANG, Kapenombanna.

Mintu’ pengkarangan tu naparandukmo diona kapengkaolan lan banuanNa Puang Matua sia iatu Sukaran aluk sia pepasan, tu nanii undaka’ Kapenombanna, napogau’ situang kalantukan penaanna, sia maupa’ lan mintu’nato.